Primer terciu del sieglu XX

Primeros pasos:

Dende principios del sieglu XX hasta la proclamación de la República n’abril de 1931 socediéronse éxitos y fracasos, avances y retrocesos y hasta dixebres internes, reflexu de les que se daben nel ámbitu nacional. Con too y con ello, dempués de la primer década del sieglu pasáu, el socialismu convirtióse nel principal componente del movimientu obreru asturianu.

Primeros pasosLos díes 28 y 29 d’agostu de 1902 celebróse en Xixón el VI Congresu Nacional del PSOE. Un añu primero, en setiembre de 1901, Pablo Iglesias visitare Asturies, recorriendo los conceyos de Mieres, Uviéu, Xixón, Llanera, Siero, Pravia, Sotu’l Barcu y Avilés.

Acordies cola resolución de la II Internacional Socialista qu’encamentaba “dar puxu a la educación y la organización de la mocedá col envís de lluchar contra’l militarismu”, na primer década del sieglu XX surden en delles agrupaciones les Mocedaes Socialistes. N’Asturies, el movimientu mozu entamó en 1904, cuando José María Suárez, el so hermanu Juan Antonio, Teodomiro Menéndez y Aurelio Cuartas fundaron Mocedá Socialista d’Uviéu. En 1914 constituyóse la Federación de Mocedaes Socialistes d’Asturies y César González foi nomáu Secretariu Xeneral.

Feches conseñables pal afitamientu del socialismu asturianu son tamién les de la fundación, per parte de Manuel Llaneza, del Sindicatu d’Obreros Mineros d’Asturies (SOMA), conviviendo les sos agrupaciones coles socialistes nes Cases del Pueblu de magar la so creación en 1910; y la constitución en 1925 de la Unión Xeneral de Trabayadores d’Asturies.

Cases del Pueblu

Casas del Pueblo
La coyuntura tan favoratible que supunxo pal carbón la neutralidá española na Primera Guerra Mundial (1914-1918) fixo posible algamar recursos pa financiar la construcción de munches Cases del Pueblu. Ente toes elles, unes sesenta, destaquen dalgunes pola so envergadura y calidá de construcción: Mieres, Sama de Llangréu, L’Entregu (Samartín del Rei Aurelio), Uviéu.

Casas del Pueblo
Frente a lo insano de les viviendes obreres, naguábase por ufiertar a los trabayadores, en palabres de Manuel Llaneza (El Socialista, 6 de mayu de 1917), “llugares allegres, acionaos, onde nun tengamos sólo los nuestros llocales, sinón tamién organismos d’entretenimientu y distracciones cultes que nos separten del garitu indecente onde güei nos embrutecemos al empar que nos allegren el vivir”.

La idea yera desendolcar programes formativos con plantegamientos avanzaos.

Orfeones, rondalles, grupos de teatru de Mocedaes Socialistes, charles de discutiniu o alderiques sobre distintos temes xunto col contactu cola naturaleza con escursiones y xires preparaben l’ánimu de los militantes pa deprender a lleer y a escribir na Escuela laica, si nun sabíen; p’asistir a los cursos de les Escueles de Branu; a los ciclos de conferencies que s’entamaben o, cenciellamente, p’aficionase a la llectura de prensa. En definitiva, p’algamar la formación política y firmeza ideolóxica propies del obreru con conciencia, pasu primeru pa la so emancipación dafechu.

Dirección y práctica política

Foi la xeneración moza qu’entra nel socialismu asturianu al entamar el sieglu XX la que fai de so la responsabilidá orgánica y la práctica política. Ye de destacar el papel de los hermanos uvieínos José María y Juan Antonio Suárez. La biografía del primeru va paralela, hasta la so muerte en 1927, cola de los dos principales cabezaleros del socialismu asturianu, Manuel Vigil Montoto y Manuel Llaneza. Col primeru collaboró na ellaboración de La Aurora Social, sustituyéndolu inclusive na dirección del periódicu y na presidencia de la FSA-PSOE. No que se refier a la so rellación con Llaneza, Andrés Saborit escribe que “dende los primeros pasos daos por Manuel Llaneza pa crear el Sindicatu Mineru foi’l so brazu derechu”.

Dirección y práctica política
Pela so parte, Juan Antonio Suárez concentra na so persona, depués de la muerte del so hermanu, la secretaría xeneral de la FSA-PSOE y la dirección de La Aurora Social. Neses responsabilidaes afrontó’l final de la dictadura de Primo de Rivera y los fechos que la siguieron, ente ellos les elecciones municipales del 12 d’abril de 1931 que fixeron posible la proclamación de la República.

La participación nos procesos electorales, suspendíos temporalmente por Primo de Rivera, conformó’l procedimientu ordinariu emplegáu pol socialismu democráticu p’algamar el control de los muérganos de decisión política. El fraude electoral que se daba de contino nun foi quien pa torgar la presencia progresiva de los representantes del socialismu rexonal en Conceyos, Diputación y hasta nes Cortes Xenerales.

El 1 de xineru de 1902 abriéronse, per primer vez, les puertes de dalgunos conceyos asturianos pa los socialistes. Nes elecciones del mes de payares anterior salieron elexíos seis conceyales: n’Uviéu, Ángel Suárez Fierro y Manuel Vigil Montoto; en Mieres, Aureliano Suárez y Francisco Palau; y en Castrillón sacáronse otros dos conceyales, de los que nun se conoz el nome. Nes elecciones del añu 1903 presentáronse once candidatos socialistes, saliendo escoyíos nueve.

Pero’l despegue definitivu diose na segunda década del sieglu, llueu de la formación, en 1909, de l’alianza republicano-socialista: si n’España, al añu viniente, el PSOE llograba’l so únicu diputáu, Pablo Iglesias, n’Asturies trunfaba de forma rotunda en Xixón Melquíades Álvarez, republicanu coalligáu col PSOE. Foron años nos que’l socialismu dexóse sentir n’Uviéu y en munchos conceyos de les Cuenques. Recuérdase a José Fernández Flórez, que ganó l’alcaldía de Samartín del Rei Aurelio en 1918; a Antonio F. Cienfuegos, que fexo lo mesmo en Llangréu en 1920; y, sobre manera, a Manuel Llaneza, que lo foi en Mieres en xineru de 1918, depués de salir conceyal en 1911. Alcaldes y conceyales socialistes, armaos col Programa Municipal del partíu, dexaron cola so xera una güelga inescaecible.

Pero l’enclín del socialismu asturianu a convertise nun movimientu de mases y en fuerza electoral de sonadía viose enzancáu poles bultables crisis internes, representación rexonal de la situación xeneral española.

Momentos de crisis:

Momentos de crisis

N’Asturies vivióse con intensidá particular la fuelga xeneral revolucionaria d’agostu de 1917. Convocada por UXT y CNT en toa España, cincó los principales centros industriales, pero foi un fracasu. Fechu determinante pa ello foi’l rápidu apresamientu del Comité de Fuelga, en Madrid, formáu polos socialistes Andrés Saborit, Julián Besteiro, Daniel Anguiano y Francisco Largo Caballero.

La represión que siguió a los acontecimientos foi descomanada, mui en particular n’Asturies. Los bandos del xeneral Burguete, onde se-yos aplicaba a los mineros l’alcuñu de “alimañes”, foron l’entamu de castigos mui dañibles.

La segunda crisis vieno darréu de la frayadura del socialismu español en 1921. La escisión mozcó sobre manera a les Mocedaes, que nun alicaríen hasta’l final de la dictadura.

Por toes estes circunstancies, la proclamación de la dictadura, en setiembre de 1923, nun llegó col PSOE y la FSA nos sos meyores momentos. Los efectos de la represión que siguió a la fuelga de 1917 y de la escisión comunista entá taben presentes: de los 1.400 militantes de 1919 pasaríase a unos quinientos en 1923.

Nos primeros años d’esa dictadura la táctica collaboracionista, defendida por Largo Caballero col respaldu d’un Pablo Iglesias yá mui enfermu, determinó’l distanciamientu ente les executives del PSOE y la UXT de los trabayadores.

En cuantes al socialismu rexonal, los síntomes de recuperación déxense notar principalmente dende les Mocedaes, al incorporase a elles nomes como José Barreiro, José Mata Castro, César Antuña, Paulino Rodríguez, Manuel Fernández Peón, Rafael Fernández, Luis Roca de Albornoz, Manuel Otero, Joaquín López, los hermanos Montes (Luis, Secundino y Rufino). Y tamién la formación de los primeros grupos de muyeres, con Purificación Tomás, Selina Asenjo, Pilar Santaeufemia, Pilar Lada, Esmeralda Maseda. Apuerta d’esta miente una nueva xeneración de socialistes que, nacíos y nacíes nes dos primeres décades del sieglu, vivirán mui de recio la rabasera d’acontecimientos que llegarán darréu.

Galería de imaxenes

Close Menu