Oríxenes y Constitución

Oríxenes

El 2 de mayu de 1879 fundóse en Madrid el Partíu Socialista Obreru Español (PSOE). N’Asturies, una llarga xera propagandística fixo vidable l’allugamientu de la ideoloxía socialista na última década del sieglu XIX, cuando a la miseria obrera en mines y fábriques nun la acompañaba concienciación nenguna ente los trabayadores.

Esa xera propagandística enfrentóse a les llendes puestes a la llibertá política y sindical, esfronóse cola competencia del anarquismu y sufrió’l despreciu de los partíos republicanos. Francisco Cadavieco, Manuel Vigil Montoto, Ramón Fanjul y Eduardo Varela son nomes grabaos na historia del socialismu asturianu pol so abegosu llabor, que non siempre se vio recompensáu polos resultaos.

Pablo Iglesias, fundador del PSOE, collaboró naquella xera. La so primer visita a Asturies foi’l 26 de febreru de 1892. Dos díes más tarde intervieno nun mitin nel teatru d’El Fontán d’Uviéu. Les reseñes de la prensa llocal concluyíen que “enxamás enraigonarán n’Asturies les idees socialistes”. Y los empresarios de la dómina fixeron esfuerzos pa qu’asina fuere, iguando llistes negres de los asistentes. A pesar de too, Pablo Iglesias multiplicó les sos visites a Asturies.

Estos enfotos ufiertaron bien pronto resultaos orgánicos. En 1891, el númberu 300 d’El Socialista recoyía la constitución en Xixón de la primer Agrupación Socialista Llocal. En 1892 creábase la d’Uviéu. Y l’arranque dafechu del socialismu asturianu llógrase cuando se constituyen, en 1897, les agrupaciones de Mieres y Sama de Llangréu.

El 6 de setiembre de 1896 apaeció en Xixón el primer númberu de La Aurora Social, muérganu oficial d’espresión del socialismu asturianu hasta l’apaición del diariu Avance. Na solicitú d’autorización indicábase que se diba publicar “cada dos domingos y defenderá les idees socialistes del partíu obreru”. En 1898 les autoridaes suspendíen la so publicación, pero un añu dempués, ochobre de 1899, remanez otra vuelta n’Uviéu.

Ente 1899 y 1901 produzse’l verdaderu raigón del socialismu n’Asturies. El protagonismu nos munchos conflictos llaborales, el refugu perclaru a la Guerra de Cuba, la participación en comicios electorales –alcordada pa denunciar el remanamientu que de contino sufríen–, la celebración, de magar 1891, de la xornada reivindicativa del 1u de Mayu, la crítica permanente de les condiciones de vida de los trabayadores ya inclusive la denuncia d’espectáculos vergoñosos como les corríes de toros centraron l’actividá nesi tiempu alteriáu y dieron puxu a la so creciente nombradía.

El 27 de xineru de 1901 celebróse, nel Centru Obreru d’Uviéu, el Congresu fundacional de la Federación Socialista Asturiana del Partíu Socialista Obreru Español (PSOE).

Manuel Vigil Montoto (Xixón, 1870 – Valencia, 1961) foi escoyíu presidente del primer Comité Provincial. Tamién foi director del selmanariu La Aurora Social

Constitución

El Congresu constituyente de la FSA-PSOE celebróse nel Centru Obreru d’Uviéu’l 27 de xineru de 1901. Asistieron, según Manuel Vigil Montoto, 35 delegaos de 14 agrupaciones que representaben a 1.867 afiliaos. Esta cifra d’afiliaos ye mayor según La Aurora Social: 6.867.

Les agrupaciones que participaron naquel Congresu constituyente fueron:

  • Xixón. Constituyida en payares de 1891.
  • Uviéu. Marzu, 1892.
  • Abril, 1897.
  • Ochobre, 1897.
  • Turón. Ochobre, 1897.
  • Marzu, 1898.
  • Avilés. Avientu, 1899.
  • Muros de Pravia. Mayu, 1900.
  • Areñes (Siero). Ochobre, 1900.
  • La Moral. Payares, 1900.
  • Payares, 1900.
  • San Andrés. Payares, 1900.
  • Sotu’l Barcu. Payares, 1900.
  • Quirós. Xineru, 1901.

El Congresu presidiólu Manuel Vigil Montoto (Xixón, 1870 – Valencia, 1961), que tamién foi escoyíu director de La Aurora Social y presidente del Comité Executivu Provincial. Dellos díes depués nombraríase a Antonio S. Morán (vicepresidente); José Uría (secretariu del Esterior); José Cabal (secretariu d’Interior); Ángel Suárez (tesoreru); Cándido Gutiérrez y Perfecto García (vocales).

Galería de imaxenes

Close Menu