María Luz Pontón Álvarez

Secretaria d'Educación, Universidades y Normalización Llingüística

Nacida en Mieres, María Luz Pontón ye Doctora en Pedagoxía pola Universidá d’Uviéu, Llicenciada en Filosofía y Ciencies de la Educación, Diplomada en Profesoráu d’Educación Xeneral Básica (Especialidá de Llingua Española, Filoloxía Francesa y Filoloxía Inglesa) y Esperta en Filoloxía Asturiana y n’Informática Educativa.

Dedicada a la enseñanza dende 1988 en dellos centros asturianos, dende 2005 ye profesora titular del Centru de Persones Adultes d’El Fontán n’Uviéu. Ye miembru del Conseyu Social de la Universidá d’Uviéu. Impartió y coordinó destremaos cursos y ponencies sobre l’alumnáu d’Altes Capacidaes. Ye coautora de dellos artículos rellacionaos cola función educativa en delles revistes especializaes. Tien asoleyaes veintiocho obres de lliteratura infantil y xuvenil, n’asturianu y castellanu, tando traducíos al catalán dos d’elles.

Dende 2008 a 2012 coordina les obres del teatru infantil «Asturmitomanía», de la que ye autora. Ente los años 2002 y 2009 dirixe y presenta en Localia Asturies Televisión el primer programa infantil n’asturianu, «La Tele de los Escolinos». Dende 2006 a 2012 dirixe y presenta’l programa «Revoltixu nes Ondes» y en 2016 dirixe y presenta «La Maxa de la Memoria» na RPA (radio pública autonómica del Principáu d’Asturies). Ente los años 2016 y 2017 dirixe y presenta «Vides Cruzaes» en Radio Asturies, Cadena Ser y anguaño, na mesma cadena, dirixe y presenta’l programa «N’alcordanza».

Close Menu