L’exiliu

La Comisión Socialista

A lo llargo de la dictadura franquista, el socialismu asturianu sufrió la xebradura xeográfica, determinada pola salida de la rexón de miles de combatientes y, en muchos casos, de les sos families.

La Comisión Socialista
Al cayer Cataluña a principios de febreru de 1939, miles d’españoles pasen la frontera francesa, teniendo qu’amontonase en campos inhumanos de refuxaos, obñigaos a metese en brigaes de trabayu o escoyendo l’alternativa de ser parte de los núcleos flotantes (fuxíos) nes grandes ciudades del sur (Toulouse, Perpignan, Narbonne, etc.) y en París. Otros, provinientes na so mayor parte de la zona Centro-Sur, última en cayer en manes de les tropes franquistes, vivíen en condiciones de llaceria nes colonies franceses del Norte d’África (Arxelia y Marruecos). Los socialistes exiliaos carecieron, arriendes, les consecuencies del estallíu de la II Guerra Mundial y del control de Francia por tropes hitlerianes o pol gobiernu de Vichy. Intentar pasar inalvertíos o entrar nel maquis francés fueron les escoyetes p’aquellos que nun pudieron ser evacuaos a México.

La Comisión Socialista
Lliberada Francia de la ocupación alemana n’agostu de 1944, los socialistes asturianos collaboraron con un gran determín na reorganización del PSOE y de la UXT en dos Congresos celebraos en Toulouse en setiembre y payares. N’ochobre de 1945, quedó constituyida formalmente la Comisión Socialista Asturiana (CSA) que, siempre baxo’l control disciplinariu del Partíu, venceyará a la mayor parte de los socialistes exiliaos d’una y otra oriella del Atlánticu hasta la so desapaición al entamar la transición democrática. Nel aconceyamientu constitutivu que se fixo en Montauban, cerca de Toulouse, elixéronse pa la primer Comision Executiva:

  • Secretariu Xeneral: José Barreiro
  • Secretariu Axuntu y Tesoreru: César Antuña
  • Secretariu d’Estudios: Daniel Noval
  • Secretariu Alministrativu: José Fernández Flórez

Esta dirección, que malapenes varió a lo llargo los años, a nun ser pa cubrir col ex-guerrilleru José Mata la vacante dexada por José Barreiro en 1975, encargóse de facer vidable la formación de grupos asturianos y de cumplir destremaos oxetivos, como la recaldación de fondos pa los compañeros que n’Asturies caltuvieron vives les organizaciones socialistes.

Reorganización

Reorganización

Nel interior, los militantes de les distintes organizaciones del Frente Popular traten d’organizase pa caltener la solidaridá colos que pasaben peles situaciones más difíciles. Una xera complicada porque a la violencia represiva había qu’amesta-y amás la perda de compañeros pervaloratibles, desapaecíos, fusilaos, exiliaos, sentenciaos a prisión o n’espera d’execución. Cárceles, campos de concentración, la fuxida al monte y davezu la muerte… esperaben a los homes y muyeres d’izquierdes que nun llograren salir del país.A pesar d’estes condiciones tan llacerioses, los socialistes asturianos entamaron la reorganización orgánica, que dio aniciu en cárceles y colonies de trabayadores. El 5 d’ochobre de 1943 axuntábense n’Uviéu seis compañeros que, respaldaos polos socialistes fuxíos y los de les colonies, constituyíense en Comité Provincial de la FSA.

Florentino Zapico –uvieín, llegáu al socialismu dende les files d’Izquierda Republicana na so estancia na cárcel– presidió la primer Executiva de la reorganizada FSA. Ocupen tamién posición destacada Bernardino Díaz, Silvino García y Wenceslao Fernández. En pocu tiempu formáronse 32 comités repartíos pela provincia, ente ellos el Comité de Monte guerrilleru.

Esi mesmu mes d’ochobre de 1943, Sócrates Gómez formaba la primer executiva del PSOE n’España na clandestinidá, con Gómez Egido como presidente y él mesmu como Secretariu Xeneral. N’abril de 1944, na Dehesa de la Villa madrileña, tuvo llugar el primer plenu de les federaciones rexonales del Partíu. En xunu, socialistes, cenetistes y republicanos fundaben l’Alianza Nacional de Fuerces Democrátiques (ANFD) a la que, en 1946, amestaríense’l PCE y los monárquicos.

Nin la cayida de la Comisión Executiva del PSOE, reorganizada por Eduardo Villegas, nin los problemes creaos polos comunistes dientro l’ANFD, anubrieron un horizonte nel que les circunstancies internacionales apuntaben a un rápidu final del franquismu.
Sicasí, por causes varies, nel añu 1946 frayóse’l desarrollu xeneral de la oposición al franquismu y el socialista en particular. Pesó nello la evolución de les rellaciones internacionales: si hasta 1946 medraren les espectatives d’una cercana cayida de Franco, a partir d’esi añu –col entamu de la Guerra Fría– xeneróse una sensación de desmoralización y d’impotencia. El réximen franquista decatábase de que’l tiempu xugaba en favor d’él y afondaba na represión. Nostante, enantes entá de que la presión policial produxere los sos efeutos, el Comité de Monte de la FSA reorganiza de mou simbólicu’l Sindicatu Mineru, nun actu celebráu’l 23 de marzu onde tuvieron Florentino Zapico, como Presidente de la FSA, y Eduardo Villegas, Presidente de la Executiva Nacional del PSOE.
Pero en marzu, la policía detenía a la mayor parte del Comité Provincial de la Federación Socialista. Dellos miembros como Zapico, Bernardino Díaz, Wenceslao Fernández o Silvino García llograron escapar a Francia. La zapicada, como se conoció’l golpe de la policía, desarmó dellos comités llocales y foi l’ entamu d’una serie d’acciones que dexaron cuasi inútil a la organización. El fenómenu marcó una verdadera inflexón nel desarrollu de les organizaciones socialistes del interior. De magar 1946, y hasta los años 70, los socialistes llendaron a costa fecha les sos ambiciones a la creación de cuadros organizaos namái en delles rexones, ente elles Asturies. La estratexa de retraimientu acentuaráse tres el fracasu d’Indalecio Prieto nel so intentu de llegar a un alcuerdu colos monárquicos non “collaboracionistes” p’acelerar el final del franquismu.

Los 50, retraimientu

Los 50, retraimiento

A la estratexa de retraimientu nun fueron ayenes les organizaciones socialistes asturianes. Depués de los golpes de 1946, FSA y SOMA-UXT –auníos hasta lo cabero’l franquismu– pasen a ser coordinaos, dende Xixón, por José Manuel Alonso Paniceres, hasta la so cayida’l 1u Mayu de 1947.Los homes del Comité de Monte asumieron en xunu tola responsabilidá del partíu, y de la UXT, n’Asturies, constituyéndose una Comisión Executiva formada por José Mata, Tamayo, como Presidente; Manuel Fernández Peón, Flórez, como Vicepresidente; Arístides Llaneza Jove, como Secretariu; y Manuel Fernández Casas, Lele, como Tesoreru. Esta executiva caltúvose hasta daqué enantes de salir los guerrilleros socialistes pal exiliu pel puertu de Lluanco, el 23 d’ochobre de 1948. Esi día poníase puntu final a once años de resistencia, finxando los guerrilleros a lo llargo de toos ellos les sos intervenciones, acordies coles órdenes del Partíu, al mínimu indispensable pa dar seguranza de la so supervivencia y la de la organización nel llanu. El Plan Prieto pa la solución del problema español, chocaba col caltenimientu nel interior de la llucha armada. Esto y l’incrementu de les acciones represives, ente elles los socesos tan sangrinos del Pozu Funeres (1948) contra los que, aparentemente, collaboraben cola guerrilla, determinaron la partida pa Francia de los homes del monte socialistes. El martes 25 d’ochobre dába-yos l’acoyida en San Jean de Luz el mentor principal de la so salida, Indalecio Prieto, que cuntó col sofitu d’Amador Fernández y de la Executiva de la CSA, representada nel actu pol so presidente, José Fernández Flórez, padre de José Fernández Peón (comandante Flórez ).

Los 50, retraimientoa
La represión de contino, durísima amás en dómines como los meses de febreru y marzu de 1952 o en mayu de 1955, y l’aguardable ablayamientu en que dalgunos cayen fueron factores que punxeron dacuando a la FSA y la UXT baxo mínimos. Pero enxamás dexaron de funcionar.

El llabor de los homes de la CSA nel exiliu, que col so sofitu económicu y moral llograron en permuncha midida la supervivencia de les organizaciones socialistes rexonales, y el trabayu nel interior de los grupos de L’Agüeria Carrocera, Carbayín, Tiuya, Sama y Uviéu llograron el caltenimientu del socialismu n’Asturies. Nel grupu de Sama hai que recordar, ente otros, nombres como Pepe Llagos; Rufino Montes; Isidro Castro; Vicente Fernández Iglesias el Polléu ; Herminio Alvarez; o Daniel Iglesias que, como Perfecto Antuña (Peto o Petra) volviere de Francia; Cecilio Pérez Castaño Cilio; Pepín de Rondera; Jesús Castaño; Aurelio Iglesias; Manuel Cuervo; Valeriano León. N’Uviéu actuaron Emilio Llaneza; Jenaro Fernández El del Niza; Cándido Jiménez el del Cristo; Andrés Ladreda El Rabiáu; Wenceslao Mori; Fernando Cabal Pintado; o’l grupu de Llatores, ente los que taben Amalio Álvarez, Baldomero Álvarez, Jesús Álvarez, Marcelino González Canterina, Benjamín Muñiz, Amador Fernández, José Fernández Rodríguez; Ángel Valle Gelu...

Los 50, retraimiento
Tiénense anuncies documentaes, inclusive, de la celebración de plenos rexonales, como’l que tuvo llugar n’El Naranco “aprovechando la xira” a principios d’agostu de 1950, cola asistencia de 20 delegaos que recibieron les instrucciones que dende l’exiliu traía Petra o Peto, esto ye, Perfecto Antuña de La Rasa (Carbayín, Siero).

Organización y recursos concentrábense, sobre manera, na cuenca del Nalón y, de fechu, unos pocos asumen énte l’esterior representaciones diverses: nos años 50 Rufino Montes Súarez y Vicente Fernández Iglesias roblaben cartes, informes y comunicaos colos alcuños H. Salgado, J. Soto y Justo C., según actuaren como presidentes de la FSA, de la Federación Nacional de Mineros o como secretarios del SMA. N’Uviéu tamién había militantes mui activos. Jenaro Fernández, qu’entró a formar parte de la Executiva de la FSA nos años 50, convirtió El Niza, restaurante de la so propiedá, nel centru neurálxicu de l’actividá clandestina” y puntu d’alcuentru d’enllaces y contactos nacionales y estranxeros. Ente esos enllaces foi piedra maestra a nivel rexonal y nacional Vicente Requena, que trabayaba como taxista na ciudá, conduciendo un coche propiedá de Jenaro Fernández, hasta que falleció n’estrañes circunstancies en mayu de 1956. El so sustitutu, el tamién citáu Cándido Jiménez, morrió al cabu d’un añu d’asumir aquella responsabilidá.

La cayida de 1958

La caída de 1958 La caída de 1958

L’añu 1958 llantó un finxu na historia del socialismu nacional y rexonal: la gran redada de la policía del mes de payares desiguó una gran parte de la organización que con tantu procuru y trabayu se fuere creando. L’acontecimientu pue considerase como la consecuencia cabera d’un procesu abiertu col inxerimientu nel socialismu nacional del vascu Antonio Amat Maiz Guridi, que dende mediaos de la década trató de vencer la escayencia de les organizaciones del interior, camudando la estratexa de retraimientu y moderación, sofitada poles executives de la UXT y del PSOE asitiaes en Toulouse. Executives de les que yeren secretarios xenerales Pascual Tomás y Rodolfo Llopis, respeutivamente, y de les que formaba parte José Barreiro como vocal na de la UXT dende 1946 y como vicesecretariu na del PSOE dende 1950.
L’anovación plantegada por Amat Maiz pidía devolver al interior la capacidá de decisión, perdida en favor de Toulouse llueu de la desaparición de Tomás Centeno l’añu 1953.

El riesgu del particular activismu d’Amat yera grande y, según munchos albidraben, anque almiraren el so coraxe y el so determín, llevó a la so detención en payares de 1958 y, darréu d’él, de casi un cientu de militantes socialistes de toa España. N’Asturies cayeron tolos que llevaben la Federación Socialista, a nun ser Rufino Montes que llogró escapar a Francia.

Los 60, anovación y resurdimientu:

Los sesenta, renovación y relanzamiento

La tresformación que vivió España nos años sesenta y entamos de los setenta y la renacencia de la oposición al franquismu en medios obreros y d’estudiantes, esbozáu enantes y medrando de magar entós, esixeron l’afayamientu de les organizaciones socialistes.

L’esmolecimientu del interior atendiéronlu les MM.SS. del exiliu, organizaciones como la CSA que presidía Barreiro y delles individualidaes significatives que vivíen en Francia y México. Eso permitió frayar la resistencia al cambiu de la UXT que presidía Pascual Tomás, y Manuel Muiño dende 1969, y del PSOE, presidíu por Rodolfo Llopis, nos congresos de 1970 y 1972 nel partíu, y del añu 71 nel sindicatu.

El camudamientu d’actitudes na FSA entamare llueu del desmantelamientu del últimu Comité Provincial clásicu, en payares de 1958. Al Comité y a l’actividá clandestina llegó xente mozo como Herminio Álvarez; los hermanos Marcelo y Arcadio García, de Samartín del Rei Aurelio y Pedro y Paulino León, de Mieres; Avelino Pérez, José Castro, Prudencio Magdalena, Pablo García, Emilio Barbón…

Los sesenta, renovación y relanzamiento

El cambiu nes rellaciones ente interior y exiliu y la poca esperiencia y permuncha ardentía d’estos dirixentes mozos, inxertos nuna sociedá con una conflictividá que se dispara dempués de les fuelgues mineres del 62 y 63, provocó una verdadera crisis na FSA, que vivió una década revuelta, con desalcuerdos internos y cayíes qu’enzancaron el so crecimientu.

L’enclín ruémpese cola presencia n’Asturies d’Agustín González (Otilio), llegáu dende Bruxeles en 1968. Nacíu en 1929 en L’Agüeria de Carrocera (Samartín del Rei Aurelio), foi mineru dende mui nuevu y entró en 1950 nel PSOE. Cinco años dempués, darréu de la represión, entamó camín del exiliu, topando mou nes mines de Charleroi (Bélxica). La presencia de González, que va a vivir a Roces (Xixón), contribuyó enformar a calmar les agües revueltes del socialismu asturianu: a principios de 1970 les noticies que llegaben a Toulouse provinientes d’Asturies entamaben a ser d’enfotu.

El nuevu Comité Provincial, que surde d’un aconceyamientu en Mieres con presencia de delegaciones de Xixón, Llaviana y Sama y que preside Joaquín López, sedría l’encargáu de zarrar la crisis na que venía fundiéndose la FSA y entamar el so resurdimientu dientro del movimientu anovador del socialismu español, aniciáu en 1970 y al que se punxo puntu nel Congresu del PSOE celebráu en Suresnes (Francia) n’ochobre de 1974.

Los sesenta, renovación y relanzamiento
El socialismu asturianu entama d’esta miente una dómina de muncha actividá, perpasando’l desconciertu anterior. Jesús Zapico, mineru d’Ayer que vive en Xixón, recibe l’encargu d’Agustín González de treslladase a Uviéu pa dar puxu a la organización. El guañu orgánicu sigue biltando, anque con muncha prudencia a la hora de guetar militantes. González y Marcelo García fadrán un llabor asemeyáu en Xixón y Avilés. Pablo García va ser, pela so parte, el creador del importante grupu de Los Barreros. Sedrán sobre too mozos, estudiantes na so mayor parte, los que van tener un papel destacáu nel socialismu asturianu dende los años caberos del franquismu.

Esti procesu coincide col resurdimientu de la xera propagandística, les concentraciones cada vez más concurríes nel puertu Tarna, les xuntes na cabaña de la sierra de Peña Mayor. Y colos contactos regulares ente’l socialismu asturianu, l’andaluz (Felipe González, Alfonso Guerra, Luis Yáñez, Miguel Ángel del Pino) y el vascu (Nicolás Redondo, Enrique Mújica, Eduardo López Albizu).

Superar l’inmovilismu nel socialismu español pasaba per recuperar pal interior la capacidá de decisión, por asitiar n’España la mayoría de la executiva. La primer gran batalla llibróse nel XI Congresu del PSOE nel exiliu, celebráu en Toulouse, ente los díes 13 y 15 de mayu de 1970. La delegación sevillana encabezada por Felipe González, con pautu previu con asturianos y vascos, plantegó y llogró la formación d’una dirección mista formada por representantes del exiliu y del interior, anque éstos siguíen siendo minoritarios. Esa situación superóse nel XII Congresu (13 al 15 d’agostu de 1972), afitándose una dirección colexada formada na so mayor parte por cuadros del interior. El cambéu perfíxose nel Congresu de Suresnes (11 al 13 d’ochobre de 1974), cuando la totalidá de la Executiva del PSOE, con Felipe González como primer secretariu, pasó al interior.

Galería de imaxenes

Close Menu