La Transición

La salida del túnel

La salida del túnel

La muerte de Franco en 1975 abre l’escayosu trabayu de la transición hacia la democracia, asitiada namái dempués del trunfu del PSOE nes elecciones xenerales d’ochobre de 1982.

Nel aniciu d’esti procesu históricu, rescamplen de mou particular dalgunos fechos. Por exemplu, l’aconceyamientu rexonal de les Mocedaes Socialistes d’Asturies convocada en setiembre de 1975 en Los Barreros (Llaviana) pa escoyer a la primer Comisión Executiva dende’l final de la Guerra Civil, con Francisco Villaverde como Secretariu Xeneral, cargu qu’ocupó hasta 1977, cuando s’inxirió na Executiva nacional. Los socialistes asturianos mozos non sólo se confirmen como organización autónoma dientro del proyectu socialista, sinón que s’enfoquen a hexemonizalu.

La salida del túnel
N’ochobre de 1975, entá na clandestinidá, l’aconceyamientu fechu na cabaña de Peña Mayor, con 20 a 25 delegaos de toa Asturies, constitúi una nueva CE de la FSA, na que Jesús Sanjurjo, de 20 años d’edá, ye elexíu Secretariu Xeneral, cargu nel que se caltuvo hasta 1988, sacante l’añu 1977 y el primer semestre de 1978 cuando la responsabilidá foi asumida pol históricu Rafael Fernández que, cola so muyer Purificación Tomás, volviera del exiliu en México. Formaben tamién parte de la mesma executiva otros compañeros como Ludivina García Arias, Aladino Cordero, Celestino Suárez, Fran Varela o Agustín Tomé, toos ellos de la edá de Sanjurjo aproximao.

Arriendes de los incluyíos nes comisiones executives constituyíes en Los Barreros y en Peña Mayor, dexábense ver tamién José María Fernández Chema, Juan Luis Rodríguez Vigil y los estudiantes de la Facultá de Derechu d’Uviéu, Álvaro Cuesta, Luis Posada, Jaime Estrada, Carlos Piñeiro, Juan José Montero y Miguel Fernández; Rubén Begega y Longinos, del grupu de Los Barreros; los avilesinos encabezaos por Faustino García Zapico; José Ángel Fernández Villa que, lo mesmo que Nelly Fernández y Manuel Ponga llegaron al PSOE a traviés del Fondu Unitariu de Solidaridá Obrera d’Asturies (FUSOA)…

La salida del túnel

Esi grupu fixo que, de magar 1976, el socialismu recobrare’l so protagonismu n’Asturies. Celebrando actos públicos multitudinarios, lliderando la plataforma de Converxencia Democrática, dende xunetu de 1975, y, más alantre, formando parte de Coordinación Democrática, constituyida n’Asturies en xunu de 1976. Metanes la tensión reinante, vieyos y nuevos partíos preparaben les elecciones xenerales, les primeres de la transición, que se celebraríen el 15 de xunu de 1977.

La salida del túnel
El 1 de mayu la FSA fixo un mitin nel Palaciu de los Deportes d’Uviéu, amosando la so fuerza al llograr el llenu dafechu. Yá en plena campaña electoral, el PSOE dexó sentir la so voz en tolos conceyos. Los actos propagandísticos pesllaron con un gran mitin de Felipe González nel estadiu d’El Molinón de Xixón, al qu’asistieron 25.000 persones.

La salida del túnelr
El PSOE trunfó n’Asturies algamando 5.269 votos más que la Unión de Centru Democráticu (UCD) (31,81% y 30,9 % respeutivamente, sobre’l total de los votos válidos). Salieron diputaos: Luis Gómez Llorente, Honorio Díaz, José Manuel Palacios y Emilio Barbón. Per otra parte, la candidatura Por un Senáu Democráticu, formada por Rafael Fernández (PSOE), Atanasio Corte Zapico (ID) y Wenceslao Roces (PCE), llogró un trunfu rotundu. El PSOE ganó les elecciones nos conceyos de la zona central, industrial y minera.

El decisivu añu 1979

El crucial año 1979

L’añu 1979 foi clave na historia del socialismu español y asturianu. Nes elecciones xenerales (1 de marzu) y a los conceyos (3 d’abril), el PSOE asturianu medra en porcentaxe de votos –37,37% y 34,20%– en rellación a les de 1977 –30,9%–. Nos conceyos, el pautu robláu ente la FSA y el PCA fixo posible que les ciudaes y villes asturianes más importantes, a nun ser Uviéu, tuvieren alcaldes socialistes. N’abril de 1979, la FSA-PSOE confírmase como una opción política que tien qu’asumir la responsabilidá de la xestión pública.

Unos meses primero Rafael Fernández, Secretariu Xeneral de la FSA-PSOE hasta’l 10 de xunu de 1978, asumiere la presidencia del Conseyu Rexonal. El poder rexonal, eso sí, tardará entá un tiempu en facese efeutivu daveres: Asturies nun tuvo les primeres tresferencies hasta abril de 1980.

La situación de predominiu políticu de la FSA-PSOE correspondíase con daqué debilidá orgánica, puesta de manifiestu por Celestino Suárez, secretariu d’Organización, nel XXI Congresu (Perlora, 23-25 de payares de 1979). A esi congresu fueron 239 delegaos, col mandáu de 4.689 afiliaos.

Los éxitos electorales, sobre manera nos conceyos, contribuyeron al debilitamientu orgánicu, porque munches persones hubieron asumir les responsabilidaes nos ayuntamientos. Carencies que tampoco s’iguaron cola incorporación a la FSA, en 1978, d’unos 140 militantes provinientes del Partíu Socialista Popular (PSP) de Tierno Galván.

El crucial año 1979
Pero la FSA-PSOE non sólo carecía les consecuencies de la so crisis de crecimientu; tamién en 1979 pasó, lo mesmo que’l restu del socialismu español, per un gran aballón ideolóxicu, desencadenáu por Felipe González nel XXVIII Congresu, al proponer l’abandonu del marxismu como referente de la praxis política.

La delegación de la FSA tuvo gran protagonismu. Foi la moción asturiana la remanada pol madrileñu Francisco Bustelo como alternativa a la sevillana. Na mesma dexábase perclaru el calter de partíu de clase, de mases, marxista, democráticu y federal del PSOE.

L’intentu de Sevilla d’enmendar la ponencia asturiana foi derrotáu col votu del 62% de los delegaos, provocando la dimisión de Felipe González pa desconsuelu de bona parte de la delegación asturiana, na que dellos de los sos componentes encontaren la so promoción a la Secretaría Xeneral en Suresnes. Cuestionábense los principios, pero non al líder que, xunto a Alfonso Guerra, acabó saliendo reforzáu de la crisis darréu del siguiente Congresu Federal Estraordinariu (Madrid, 27 y 28 de setiembre).

La nueva dirección, con Ramón Rubial como Presidente, Felipe González como Secretariu Xeneral y Alfonso Guerra como Vicesecretariu –y onde la FSA taba representada por José Ángel Fernández Villa como Vocal–, tenía nes sos manes un partíu casi de nueva planta.

El crucial año 1979
N’Asturies, el XXI Congresu de la FSA encargóse d’adautar a la realidá rexonal los alcuerdos del Federal y escoyó la siguiente Comisión Executiva:

  • Secretariu Xeneral: Jesús Sanjurjo.
  • Secretariu de Política Sindical: Celestino Suárez (Secretariu d’Organización dende’l XX Congresu). Ángel Balbuena foi escoyíu secretariu d’Organización de mou interín hasta febreru de 1980, cuando foi nomáu, en xunta del Comité Autonómicu, Carlos Alberto Fernández.
  • Secretariu de Formación: Ovidio Villa.
  • Secretariu de Prensa: Cándido García Riesgo.
  • Secretariu de Política Municipal: Faustino González Alcalde.
  • Secretariu de Política Sectorial: José Mª Suárez.
  • Secretariu de Propaganda: José Manuel Cachero.
  • Secretariu de Cultura: Jorge Fernández León.
  • Secretariu d’Estudios: Luis Martínez Noval.
  • Vocales: Manuel Fernández Lito (Secretariu Xeneral de la UXT d’Asturies), Honorio Díaz d’UCA, José Ángel Fernández Villa (Secretariu Xeneral del SOMA dende 1978), Wenceslao López, Julio César de Llangréu, José Manuel Montes, Eduardo Lafuente (Secretariu Xeneral del Metal de la UXT d’Asturies) y Antonio Campillo.

Acordies cola llinia oficial federal, que bien ceo entamaría a denomase “guerrista”, confirmábase l’obrerismu históricu na FSA. La dirección política foi refrendada nel Congresu Estraordinariu que se fixo en Mieres (ochobre de 1981), enantes del XXIX Federal y nel XXII Congresu (Uviéu, 15 al 17 de xineru de 1982), d’u salió una Executiva con Sanjurjo otra vuelta al frente de la Secretaría Xeneral y na que Luis Martínez Noval asume la Vicesecretaría Xeneral de nueva creación.

Amás, aprobóse un programa de gobiernu pa la Comunidá Autónoma, que quedaría constituyida como tal el 31 de xineru, 20 díes depués del asoleyamientu del Estatutu d’Autonomía nel BOE. Rafael Fernández, presidente del Conseyu Rexonal y senador, foi presentáu como candidatu pa presidir el primer Gobiernu autonómicu.

Galería de imaxenes

Close Menu