José María Solís Suárez

Secretario Executivo

Nacíu en Fresneo (Tolivia, Llaviana) el 18 d’avientu de 1948 y vecín del mesmu llugar. Casáu. Mineru del Pozu Sotón d’HUNOSA.

Esmolíu pola problemática social, funda y dirixe l’Asociación de Vecinos de Tolivia. Afíliase al SOMA-UXT en 1969 y al PSOE’l primeru d’agostu de 1977. Dende les primeres elecciones sindicales llibres en 1977, hasta 1993, foi delegáu de personal del Colexu II; y, dende 1977 a 1995, de Técnicos y Cuadros del Valle del Nalón. Perteneció a la CE de Técnicos y Cuadros del SOMA-UXT de 1991 a 1995.

Secretariu de Prensa y Propaganda de l’AS de Llaviana dende 1977 hasta 1979 y Secretariu del Política Municipal de la mesma de 1987 a 1991. Esti últimu añu asumió la Secretaría Xeneral, al frente de la que taría hasta 2012, añu dende’l que, acordies colo conseñao nos Estatutos del PSOE, nun pudo siguir nel cargu. Nesta llarga etapa al frente de la emblemática AS llavianesa, José María Solís considera de méritu especial la so intervención nel arreglu del «Albergue José Mata» (Peña Mayor) y la compra por 3,5 millones de pesetes, col sofitu decisivu de Pablo García Fernández, de la mitá de la Casa’l Pueblu perteneciente a la UXT: en 1981, la Unión y el PSOE compráranla conxuntamente. Non menor importancia tuvo la igua posterior del magníficu edificiu, asitiáu nel centru de La Pola Llaviana, con un costu total de 18 millones de pesetes.

A destacar tamién que, a últimos del añu 1978, la Comisión promotora del periódicu Avance, del que yera xerente Purificación Tomás, repartió peles agrupaciones socialistes asturianes talonarios de bonos d’ayuda (a 1.000 pesetes cada bonu o acción) pa poner en marcha’l que se quería que fuere selmanariu socialista n’Asturies. José María Solís, repletu d’activismu, fízose responsable de la so xestión na Agrupación Socialista de Llaviana.

Foi ún de los 9 delegaos de la so Agrupación presentes nel Congresu Estraordinariu de la FSA, celebráu nos llocales de la UXT en Xixón, los díes 20 y 21 de xineru de 1979, congresu previu al trescendental XXVIII Congresu Federal. José Solís formó parte de la Ponencia de Prensa y Información. Repitió responsabilidá nel tamién Congresu Estraordinariu de La Felguera y nel XXI Congresu ordinariu del socialismu rexonal (Perlora, 23-25 de payares), los dos nel mesmu añu 1979, en plena crisis del PSOE.

Conceyal electu del Conceyu de Llaviana (nu 5 de la candidatura socialista) nos comicios celebraos el 3 d’abril de 1979; y otra vuelta nel periodu 1983-1987. En dambos mandatos foi portavoz del Grupu Municipal Socialista; y, nel segundu, primer Teniente d’Alcalde. Foi Secretariu del Grupu Municipal socialista y portavoz del mesmu. Tamién foi vocal de la Comisión Executiva de la FSA-PSOE dende’l XXXI Congresu de la mesma y ye Secretariu Executivu de la Comisión Executiva de la FSA-PSOE dende’l XXXII Congresu.

Close Menu