El cambiu

La FSA: fuerza política hexemónica:

La FSA, fuerza política hegemónica

De la crisis orgánica ya ideolóxica de 1979 resurdió’l PSOE en condiciones de recibir el sofitu popular pa ganar les elecciones dende 1982 hasta 1996. Y, nel casu de la FSA, hasta anguaño, a nun ser na llexislatura 1995-1999, asumiendo d’esta miente’l mandáu democráticu de siguir el llabor tresformador entamáu na Transición, gobernando la Comunidá Autónoma y la mayor parte de los conceyos. Esta xera foi perfaciéndose acompañada de los conflictos insepartables a cualesquier organización democrática y por una sociedá sutrumida polos caberos entueyos de la depresión económica y polos efectos d’una reconversión económica inevitable.

La FSA, fuerza política hegemónica
Baxo l’eslogan xenéricu Pol cambiu, el PSOE de Felipe González y Alfonso Guerra llograba una mayoría absoluta espectacular nes llexislatives del 28 d’ochobre de 1982 (48,4% de los votos válidos; n’Asturies, 52,36%). Les elecciones autonómiques, primeres celebraes n’Asturies, y nos conceyos del 8 de mayu de 1983 repitieron casi los mesmos porcentaxes: 52,17% y 49,69%.

La FSA, fuerza política hegemónica
De magar entós, el votu socialista va sufriendo, pasu ente pasu, una perda de sofitu, con daqué repunte nes elecciones de 1991, hasta llegar al 33,83% del añu 1995 (un 18,34% menos que les de 1983). Esto supunxo la perda de la Presidencia de la Comunidá Autónoma, qu’ocuparen hasta entós Rafael Fernández Álvarez (1978-1983), Pedro de Silva Cienfuegos-Jovellanos (1983-1991), Juan Luis Rodríguez Vigil (1991-1993) y Antonio Trevín Lombán (1993-1995). El 46% de los votos algamaos nes elecciones de 1999, significó pa la FSA la recuperación de la mayoría absoluta na Xunta Xeneral del Principáu, que nun tenía dende 1987 y, darréu d’ello, otra vuelta’l control del Gobiernu Rexonal presidíu, nesti casu, por Vicente Álvarez Areces. Cuatro años más tarde, en 2003, la FSA-PSOE caltenía’l so llideralgu nes urnes, col 40,48% de los votos perdiendo, eso sí, la mayoría absoluta.

ILa FSA, fuerza política hegemónica
La mayoría socialista na Xunta Xeneral determinó que la presidencia de la mesma recayere en: Eugenio Carbajal Martínez (Llexislatura Provisional y Tercer Llexislatura), Juan Ramón Zapico García (Primer Llexislatura), Faustino González Alcalde (Cuarta Llexislatura) y Mª Jesús Álvarez González (Quinta y Sesta Llexislatura).

La FSA, fuerza política hegemónica
L’enclín a amenorgar percíbese tamién nes elecciones municipales dende 1983 y hasta 1995 (perda del 14,87% de los votos), lo mesmo que la recuperación del añu 1999 (medría d’un 6,57%). En cualquier casu, inclusive nes peores circunstancies, el PSOE ye n’Asturies el poder municipal incuestionable dende 1979. El predominiu del socialismu asturianu nesta importante estaya de poder namái se vio mozcáu pol trunfu del PP n’Uviéu en 1991, por mayoría simple, convertida en mayoría absoluta nes elecciones siguientes, y pola perda circunstancial d’alcaldíes emblemátiques como Avilés, Pravia, Llangréu o Siero.

La FSA, fuerza política hegemónica

Comportamientu asemeyáu al de les elecciones autonómiques y a los conceyos alviértese nes elecciones europees y xenerales. Nunes y n’otres la evolución del votu socialista n’Asturies caltién un enclín averáu al del conxuntu del Estáu. El momentu d’inflexón que paez decisivu diose nel añu 1989, precipitándose nes elecciones xenerales del añu 2000. Sicasí, cuatro años dempués, nes elecciones del 14 de marzu de 2004, el bon trabayu de la FSA-PSOE y el llideralgu que José Luis Rodríguez Zapatero exerce nel socialismu nacional llogren invertir esi enclín, algamando cuatro diputaos.

1985-1995: década conflictiva

1985-1995 década conflictiva

El XXIII Congresu de la FSA (15 al 18 de marzu de 1985) foi l’últimu del que la prensa pudo afirmar, pol so desendolcu, qu’aquella “yera una de les organizaciones más tranquiles del PSOE.

De magar entós, dellos enfrentamientos internos y discutinios anubrieron el llabor del Partíu Socialista. El más importante, a nivel nacional, foi’l desalcuentru, pasu ente pasu, ente UXT-PSOE que cuayó nos duros alderiques calteníos ente’l ministru d’Economía y Facienda, Carlos Solchaga, respaldáu por Felipe González, y Nicolás Redondo, y qu’acabaron cola renuncia d’ésti y d’Antón Saracíbar a les sos actes de diputaos al Congresu n’ochobre de 1987.

N’Asturies, nel momentu nel que la Izquierda Socialista dexaba prácticamente d’esistir (d’ello dio anuncia’l so máximu representante, Avelino Pérez, n’ochobre de 1987), la FSA entama a resentise del enfrentamientu ente’l SOMA y la Federación Rexonal del Metal y la dirección de la UXT.

1985-1995 década conflictiva
L’alderique estalla a últimos de 1985 y amosóse bien a les clares nel discutiniu énte’l plenu del Congresu Estraordinariu previu al XXXI Congresu Federal (27-28 de payares de 1987). Jesús Morales, Secretariu de l’agrupación de Xixón, la más importante d’Asturies, enantes d’esponer la so posición personal favoratible a la xestión de la dirección del Partíu, dexó nidio por qué la delegación de Xixón tenía qu’astenese a la hora de votala: na asamblea llocal fuere la postura defendida pol 70% de los delegaos.

Ye ésa tamién l’actitú d’otres 6 delegaciones, toes elles de pequeñes agrupaciones (Muros, Carreño, Peñamellera Alta, Ribeseya, Corvera, Ribera d’Arriba) que, con Xixón, constituyíen n’Asturies el guañu d’una corriente qu’inducirá una pretendida anovación del Partíu, encontada nel allugamientu electoral de llistes abiertes, llimitación temporal ya incompatibilidaes de los cargos…

1985-1995 década conflictiva
La presión de los críticos nun dexó d’acentuase de magar entós. Sicasí, nel XXIV Congresu de la FSA (Uviéu 22 al 24 de mayu de 1988) el trunfu de los oficialistes foi, más que nunca, rotundu. El nuevu Secretariu Xeneral, el profesor de la Facultá d’Económiques d’Uviéu, Luis Martínez Noval, quedó acompañáu por un Comité Executivu onde destacaba Celestino Suárez, como Vicesecretariu Xeneral.

Dende 1988 los críticos punxeron tol so enfotu nes agrupaciones pa, d’esta miente, aumentar la so presencia nel Comité Autonómicu. Dexaron sentir la so actividá n’agrupaciones tan mineres como les de Llangréu y Llaviana; y na d’Avilés. Pero los sos éxitos más importantes algamáronlos n’Uviéu y Xixón, les dos agrupaciones más numberoses de la FSA.

1985-1995 década conflictiva
Les diferencies asoléyense nos congresos XXV y XXVI de la FSA. Nesti caberu, celebráu n’Uviéu del 23 al 25 d’abril de 1994, los 306 delegaos qu’asistieron en representación de 68 agrupaciones y 10.580 afiliaos tuvieron que decidir ente dos candidatures a la Comisión Executiva: la oficialista de Luis Martínez Noval, que llogró 190 votos (el 63%), y l’anovadora de Bernardo Fernández, que recibió’l sofitu de 111 delegaos. Los resultaos fueron prácticamente hermanos na elección de los 21 miembros del Comité Autonómicu: la candidatura oficial, con Eugenio Carvajal al frente, llogró 13 puestos y l’anovadora lliderada por Santiago Rodríguez Vega, 8.

El conflictu internu foi l’antoxana de les derrotes electorales nes europees de mayu, les autonómiques y municipales de 1995 y nes xenerales del 96.

Les diferencies punxéronse de manifiestu otra vuelta nel Congresu Estraordinariu (25 y 26 d’abril de 1997), previu al XXXIV Congresu Federal (Madrid, 20 al 22 de xunu). Polo demás, los 25 delegaos de la FSA atopáronse, como los que formaben les demás delegaciones, cola sorpresa de la renuncia de Felipe González a presentar la so candidatura a la reelección como Secretariu Xeneral, arrastrando col so determín a la renuncia tamién del vicesecretariu, Alfonso Guerra. Tratábase de facilitar la solución a los conflictos internos, xera de la que tendría que s’encargar el nuevu Secretariu Xeneral, Joaquín Almunia.

Hacia la integración

Hacia la integración

Con Joaquín Almunia como Secretariu Xeneral del PSOE, el XXVII Congresu de la FSA (Uviéu, 4 al 6 de xunetu de 1995) foi’l de la integración, zarrando una fase enforma enguedeyada abierta, como poco, 10 años enantes.Esta integración tradúxose na presencia de los críticos en 4 de les 12 secretaríes d’área y en 9 de les 19 vocalíes d’una Executiva que quedó constituyida por:

  • Presidente: Rafael Fernández
  • Secretariu Xeneral: Luis Martínez Noval
  • Vicesecretariu Xeneral: Celestino Suárez
  • Secretariu d’Organización: Fernando Lastra (anterior Secretariu de Política Institucional)
  • Secretariu d’Alministración: José Luis Fernández
  • Secretariu de Política Institucional: Valentín Ruíz
  • Secretariu de Movimientos Sociales: Carlos Rojo (anterior Secretariu d’Organización)
  • Secretariu de Política Industrial: José Vega (fallecíu’l mes de febreru de 1999 y sustituyíu por Valentín Prieto)
  • Secretariu d’Economía y Estudios: Javier Fernández
  • Secretariu d’Educación y Cultura: José Luis Montes
  • Secretaria de Formación: Mª Luisa Peretó
  • Secretaria de Participación de la Muyer: Begoña Fernández
  • Secretaria de Rellación colos Medios: Mariví Monteserín

Hacia la integración
Pero la derrota del PSOE, y de la FSA, nes elecciones del 12 de marzu de 2000 afaló’l discutiniu internu. El fechu trescendió’l socialismu rexonal nun momentu nel que’l PSOE travesaba una situación escayosa llueu de los resultaos electorales y la dimisión del Secretariu Xeneral, Joaquín Almunia, darréu d’ellos. El determín de la Comisión Política, presidida por Manuel Chaves, de convocar Congresu del PSOE pa últimos de xunetu, col envís de cubrir la vacante dexada por Almunia, aguiyó entá más los discutinios na FSA.

Los socesos del XXXV Congresu Federal (Madrid, 21 a 23 de xunetu de 2000) son conocíos: el trunfu de José Luis Rodríguez Zapatero, aunque con un curtiu marxe (414 votos frente a 405 de José Bono), refrendólu’l sofitu aplastante del Congresu al nuevu Secretariu Xeneral y a la so Comisión Executiva.

El resultáu –aparte los discutinios sobro lo decisivos que pudieron ser los votos de los socialistes asturianos na elección del Secretariu Xeneral del PSOE– foi y ye interpretao como una apuesta pol futuru y la espresión de la voluntá del Congresu d’abrir una nueva etapa ilusionante afitada na superación de los desalcuerdos fratricides, que non del alderique internu, consustancial a un Partíu de tan llarga tradición democrática como ye’l fundáu por Pablo Iglesias.

Hacia la integraciónNa mesma consideración s’asitia’l resultáu del XXVIII Congresu de la FSA (Uviéu, 4 y 5 de payares de 2000). Precedíu del que pue ser calificáu como l’últimu gran enfrentamientu ente unos y otros, el Congresu decidióse por Javier Fernández, Conseyeru d’Industria del Gobiernu Rexonal, como Secretariu Xeneral (215 votos), frente a Álvaro Álvarez (194 votos), Secretariu Xeneral de l’agrupación d’Avilés. La CE de la FSA quedó compuesta d’esta miente:

  • Presidente: Rafael Fernández
  • Secretariu xeneral: Javier Fernández
  • Secretariu d’Organización: Benjamín Gutiérrez
  • Secretariu d’Alministración: José Luis Fernández
  • Secretariu d’Asuntos Europeos y Rural: Francisco González
  • Secretariu de Política Municipal: Fernando Lastra
  • Secretariu d’Economía e Industria: Manuel Alfredo Pérez Menéndez
  • Secretaria de Comunicación: Ana Rosa Migoya
  • Secretariu d’Educación y Cultura: José Luis Montes
  • Secretaria d’Igualdá: Begoña Serrrano
  • Secretaria de Polítiques Sociales: Marta Gutiérrez

El discursu que’l nuevu Secretariu Xeneral dirixe a los presentes na sesión de pieslle dellinia les idees qu’habríen acompañar la so xera de magar entós.

Hacia la integración
El compromisu de camudar la sociedá, que caltién la FSA-PSOE dende la so fundación, sobro la base de l’aplicación de los principios, ya históricos, de llibertá, igualdá y solidaridá.

El compromisu d’esparder esos valores irrenunciables, afayándolos a los nuevos tiempos, pa llograr el sofitu de la mayoría social de progresu (trabayadores de la industria, de la minería, de la construcción, de los servicios, llabradores, pequeños empresarios, sectores progresistes, clases medies en xeneral) y, d’esa manera, trabayar dende los destremaos niveles de poder (conceyos, gobiernos autonómicos, Estáu español) democráticamente constituyíos.

El compromisu de treslladar a la sociedá la imaxe real de que’l Partíu Socialista ye presea de tresformación capaz de llevar a la práctica aquellos valores y que, poro, nun s’estrinca en sigo mesmu. El PSOE –repetía Javier Fernández, acordies col pensamientu del Secretariu Xeneral federal, Rodríguez Zapatero– tien que se manifestar como una organización llimpia, tresparente y, lo primero de too, tan plural como la sociedá mesma.

Pluralidá significa alderique internu y exemplaridá funcional democrática. Pero tamién esfuerzu integrador pa esllarigar fulanismos endémicos, clanes y families enfrentaes en discutinios ermos y aprobetayadores. Pluralidá significa ser quien p’afrontar nos principios la propuesta de soluciones a los problemes sociales estructurales –remarcaos pol neolliberalismu globalizador (paru, probeza, precariedá llaboral, vivienda, educación, sanidá, inmigración, mediu ambiente, etc.), qu’amenaza con esmantelar l’Estáu de Bienestar– y qu’en munchos de casos muévense nel ámbitu de les ONGs, el feminismu o los movimientos pacifistes y ecoloxistes. Ensin escaecer los específicamente asturianos qu’esfanen, na so mayor parte, de les insuficiencies infraestructurales y de les reconversiones industrial y minera.

Asitiándonos nesa nueva llende orgánica y social –concluyía’l Secretariu Xeneral de la FSA– fadremos honor a los homes y muyeres qu’a lo llargo de 100 años llucharon n’Asturies pol socialismu y llograremos al empar que les idees qu’allumó n’España Pablo Iglesias, al fundar el PSOE en 1879, sigan siendo perennes.

El camín entamáu por Javier Fernández foi llargamente respaldáu nel siguiente congresu rexonal, el XXIX. La so candidatura, la única presentada, llogró un sofitu que perpasó’l 90%.

Galería de imaxenes

Close Menu